Трагедија го засени напнатото финале на Лигата на нации што го играа Португалија и Шпанија во Минхен.
По регуларниот дел и продолженијата резултатот беше 2:2, па победникот беше решен на пенали. Португалија беше поуспешна и славеше. Но, на крајот од првото продолжение се случи најлошото. Сега се откриени деталите за трагедијата.
„Навивачот кој почина за време на финалето на Лигата на нации во Минхен е романски државјанин. Тој живеел во Баварија во последните години. Паднал од висина од два ката на трибините во прес-ложата“, објави романскиот инсајдер Емануел Росу.
Синоќа, УЕФА извести за несреќата: „На стадионот во Минхен се случи ситуација што бараше интервенција на службите за итна медицинска помош. И покрај напорите на лекарите да го спасат животот на жртвата, тој за жал почина во 00:06 часот. Нашите мисли се со неговите најблиски во ова тешко време.“
Шпанскиот тренер Луис де ла Фуенте, исто така, коментираше за трагедијата. По пристигнувањето на прес-конференцијата, тој рече: „Прво, би сакал да изразам сочувство до семејството на навивачот кој почина. Ова ни покажува што е навистина важно во животот.“
Шпанските медиуми пишуваа дека вработените во обезбедувањето и итните служби веднаш по падот се упатиле кон навивачот и дека, покрај тоа што му пружиле помош, го покриле местото на несреќата со чаршафи и го опколиле телото за никој да не може да ја фотографира жртвата. Иако за несреќата се знаело на трибините, натпреварот продолжил.
