Динамо и Звезда во топ 10 за најдобри академии во светот

Поранешните југословенски гиганти Динамо и Црвена звезда добија големо признание откако нивните младински академии се најдоа високорангирани меѓу топ 10-те најдобри во целиот свет.

Според најновото истражување на Меѓународниот центар за спортски студии (CIES Football Observatory), Динамо и Звезда се едни од десетте најдобри „тренинг клубови“ во светот. Анализата испитуваше колку играчи од секоја академија завршиле во 55-те најсилни лиги во светот, под услов да поминале најмалку три години во матичниот клуб на возраст помеѓу 15 и 21 година.

Белградска Црвена звезда и загрепски Динамо се на делба на импресивното 8. место, со вкупно 81 играч кои ги исполнуваат овие критериуми.

На врвот на листата се академиите на Реал Мадрид, Бенфика и Барселона, но позицијата меѓу елитата на двата клуба од големата четворка на поранешна Југославија го потврдува статусот на школите од „Маракана“ и „Максимир“ како едни од најдобрите во светскиот фудбал.

Пред нив се и Ајакс (Холандија), Спортинг (Португалија), Ривер Плејт (Аргентина) и Дефенсор (Уругвај), а топ 10 го затвора Бока Жуниорс (Аргентина).