Драма пред полетување: Играчите на Монако се соблекоа голи поради проблем со климатизацијата

Фудбалерите на Монако доживеаја вистински хорор пред денешниот натпревар против Клуб Бриж во првото коло од Лигата на шампионите.

Летот со кој играчите на Монако требаше да летаат за Белгија вчера беше ненадејно откажан додека играчите беа во авионот и се подготвуваа за полетување, а поради проблем со климатизацијата.

И, ништо не го најавуваше ужасот што ќе го снајде тимот. Играчите се качија во авионот, а потоа настана хаос. Жештината беше неподнослива, па играчите на моначанскиот тим почнаа да се соблекуваат. Прво обувките, потоа маиците.

Набрзо сите беа во долна облека. Играчите буквално се топеа од топлината, и секако сè снимаа и објавија на социјалните мрежи, па хаосот во авионот брзо стана вирален.

Потоа играчите го напуштија авионот и, облечени само во долна облека, се упатија кон пистата, каде што мораа да чекаат проблемот да се реши. Сепак, не се качија во истиот авион, туку мораа да се вратат во хотелот, а нивниот нов лет беше денеска во 11:10 часот за Остенде.

Натпреварот против Бриж ќе се игра од 18:45 часот денеска. „Црвено-белите“ имаат исклучително тежок распоред оваа сезона во елитните редови на европскиот фудбал.

По гостувањето во Бриж, ќе играат домашни натпревари против Манчестер Сити и Тотенхем. Исто така, ќе бидат домаќини на Галатасарај и Јувентус, а ќе играат и на гости против Боде/Глимт, Пафос и Реал Мадрид.