Фудбалерите на Мексико ја победија Србија во пријателски натпревар во Толука со убедливи 5:1, а два од петте голови за Мексиканците беа дела на српските фудбалери и тоа комични автоголови.
Еден од кодомаќините на Светското првенство славеше со убедливи 5:1, со што Србија го доживеа второто понижување за пет дена, со оглед на тоа што во неделата селекцијата на струмичанецот Вељко Пауновиќ загуби од дебитантот на Мундијалот, островската репрезентација на Зелен 'Рт со 3:0.
Србија, која играше со ослабен состав бидејќи најголемите ѕвезди не беа на списокот на Пауновиќ, поведе во 19-тата минута со голот на Петар Станиќ, но тоа беше сè што направи и Мексико го сврте резултатот до крајот на полувремето.
Прво Јохан Васкес израмни на 1:1 во 34. минута, а во судиското надополнување од првиот дел Стефан Бокинац му донесе предност на Мексико од 2:1 со автогол откако даде лош повратен пас до голманот Филип Станковиќ.
Раул Хименес го зголеми водството на 3:1 во 57. минута, а потоа во 72. минута Адем Авдиќ си постигна автогол кога лошо исфрлаше топка од петерецот по корнер. Конечните 5:1 ги постави Луис Чавес во 90-тата минута.
Мексико го отвора Мундијалот на 11 јуни против Јужна Африка на „Астека“ стадионот во Мексико Сити, а во група А е уште и со Јужна Кореја и Чешка.
За Србија ова беше последна проверка пред новата сезона од Лигата на нации наесен каде е во Лига А и ќе игра против Грција, Холандија и Германија.
