Легендарниот камерунски напаѓач Самуел Ето направи сосема неверојатен потег пред Африканскиот куп на нации, на кој ќе учествува и репрезентацијата на Камерун.
Како што објави британскиот The Sun, Ето е обвинет во својата земја дека како претседател на Камерунската фудбалска федерација влијаел врз селекторот Давид Пагу да го отстрани напаѓачот Венсан Абубакар од списокот на повикани играчи.
Станува збор за легендарен играч на Порто и Бешикташ и икона на камерунската репрезентација, кој моментално игра за азербејџанскиот Нефтчи и е капитен на репрезентацијата.
Зошто Ето го направил ова? Причината е едноставна. Имено, 33-годишниот Абубакар се заканува да го сруши рекордот што го држи Ето како најдобар стрелец во камерунската репрезентација на сите времиња.
Абубакар моментално има 45 голови на 117 натпревари за Камерун, а Ето стравува дека може да го надмине неговиот рекорд од 56 голови на 118 натпревари, па затоа влијаел на одлуката на селекторот да не го повика робусниот напаѓач на претстојното Африканско првенство. Абубакар беше стрелец на победничкиот гол во финалето против Египет кога Камерун го освои АФКОН во 2017 година.
Камерунците направија сеслекторска смена откако во ноември не успеаја да се квалификуваат на Мундијалот 2026 и на три недели пред почетокот на континенталното првенство го назначија домашниот стратег Давид Пагу. Покрај Абубакар, новиот селектор не го повика и голманот Андре Онана, кој сезонава настапува за Трабзонспор како позајмен од Манчестер Јунајтед.
Африканскиот куп на нации започнува на 21 декември и ќе трае до 18 јануари, а Камерун се натпреварува во групата Ф заедно со Габон, Мозамбик и Брегот на Слоновата Коска.
