Евра одамна постави дијагноза: Арсенал е како Netflix - секогаш чекаш наредна сезона

Во право беше Патрис Евра кога му постави дијагноза на Арсенал. Вчерашната елиминација од Лигата на шампионите значи дека „Топчиите“ остануваат без трофеј сезонава. Но, секогаш има наредна, нели?

За време на неговата играчка кариера, Патрис Евра беше одликуван со фанатичен борбен дух за секоја топка, секој бод, трофеј. Поранешниот француски репрезентативец и играч на Манчестер Јунајтед, кој освои 14 трофеи со клубот, како и Лигата на шампионите во 2008 година, беше гостин во поткаст што го водеше неговиот долгогодишен клупски колега Рио Фернананд во октомври минатата година.

И го насмеа слатко со коментар за можното достигнување на Арсенал оваа сезона.

„Гледањето на Арсенал е како гледање Netflix. Секогаш мора да почекаш до следната сезона“, беше коментарот на Евра.

И кога сè што се случи оваа сезона со Арсенал ќе се сублимира, Евра е апсолутно во право. Менаџерот Микел Артета потроши 700 милиони фунти за потписи во последните три сезони, но не купи ниту еден напаѓач.

Без врвни напаѓачи, нема трофеи. Во дуел помеѓу два тима без вистинска деветка, едниот мораше да се пласира во финалето на Лигата на шампионите. Овој пат беше Пари Сен-Жермен, но во Минхен на 31 мај, фаворит за подигнување на трофејот е секако Интер. Затоа што има четири напаѓачи, двајца од највисока класа како Лаутаро Мартинес и Маркус Турам, и уште двајца кои секогаш можат да блеснат, Марко Арнаутовиќ и Мехди Тареми. Луис Енрике го има Гонсалу Рамуш како деветка, но не го користи често...

Арсенал со Артета го освои ФА купот и двапати Черити Шилд. Залудни се приказните за доминација, шанси, одлични одбрани на Донарума, судиски одлуки. Како што рече Евра, Арсенал ќе мора да почека до следната сезона, бидејќи оваа ќе ја завршат без трофеј.