ФИФА планира Светското клупско првенство во 2029 година да се одржи во Катар

Светското клупско првенство на ФИФА донекаде ги исполни очекувањата, како во однос на спортот, така и во однос на финансиите. Според претседателот на ФИФА, Џани Инфантино, собрани се над 2 милијарди долари, а од спортска перспектива беше многу конкурентен фудбалски настан, кој заврши со триумф на Челси.

Инфантино веќе ги започна плановите за второто Светско клупско првенство, кое е закажано да се одржи во Катар во 2029 година, бидејќи таму веќе беше изградена фантастична инфраструктура за Мундијалот 2022.

Сепак, според одредени медиумски извештаи, Реал Мадрид и неколку други клубови поднеле предлог до ФИФА Светското клупско првенство да се одржува на секои две години, наместо на секои четири.

Иако тоа би донело двојно повеќе приходи, ФИФА смета дека во овој момент, со толку голем број натпревари и на клупско и на меѓународно ниво, одржувањето на Светското клупско првенство на секои две години е невозможно.