Дисциплинскиот комитет на ФИФА донесе строги мерки против Фудбалската асоцијација на Малезија (ФАМ) и 7 интернационални фудбалери поради злоупотреба на документи и прекршување на Дисциплинскиот кодекс. Играчите имаат аргентинско, шпанско, бразилско и холандско потекло.
Суспендираните фудбалери се: Габриел Палмеро (Шпанија), Факундо Гарсес (Аргентина), Родриго Олгадо (Аргентина), Иманол Мачука (Аргентина), Жоау Фигејреду (Бразил), Хон Ирасабал (Баскија, Шпанија) и Хектор Хевел (Холандија). Гарсес настапува за Алавес во Ла Лига, додека Мачука за Велес во аргентинската Примера.
Според објавеното, ФАМ поднела лажни документи до ФИФА за овие играчи да можат да играат за Малезија против Виетнам во третото квалификациско коло за Азискиот куп на 10 јуни. Малезија победи со 4:0, а првите два гола ги постигнаа Фигејреду и Олдадо.
Како резултат на тоа, Малезија ќе треба да плати казна од 350.000 швајцарски франци, додека секој од фудбалерите ќе мора да уплати по 2.000 франци.
Покрај финансиската санкција, сите седум играчи се суспендирани од фудбалски активности на период од 12 месеци од денот на објавувањето на одлуката. Оваа одлука може да се обжали пред Апелацискиот комитет на ФИФА.
