Финалето на ЛЕ одамна не било толку очекувано: Англиските гиганти вечер во борба да се спасат од срамот

Финалето на Лига Европа долго време не привлекло толку големо внимание во светот на фудбалот, и тешко е да се сетиме кога тимови во полоша форма играле во финалето на некое натпреварување. Тотенхем и Манчестер Јунајтед вечерва го одлучуваат шампионот.

Два паднати англиски гиганти, кои зад себе ги имаат најсрамните сезони во модерната историја на фудбалот, играат вечерва за да ја спасат сезоната. Додека еден клуб ќе ја спаси својата чест со освојување на трофејот и пласман во Лигата на шампионите, другиот ќе ја памети 2025 година како една од најтешките во историјата.

Она што е познато е дека историјата на европскиот фудбал ќе ја напише оној што ќе го освои трофејот. Победникот од вечервашниот натпревар ќе стане најслабопласираниот тим во лига што изборил пласман во Лигата на шампионите во историјата на фудбалот.

Манчестер Јунајтед е на 16-то место, а Тотенхем на 17-то во Премиер лигата, веднаш над трите екипи што испаднаа од лигата.

Доколку Ипсвич, Лестер и Саутемптон можеа да победат било кого сезонава, тогаш и опстанокот на Тотенхем и Јунајтед ќе беше сериозно доведен во прашање.

Сепак, вечерва еден од двата тима ќе ја спаси сезоната и ќе стане победник на Лига Европа, а со тоа и ќе си обезбеди место во Лигата на шампионите.

Пет екипи ќе се квалификуваат за Лигата на шампионите преку Премиер лигата, а Тотенхем или Јунајтед ќе бидат шестиот претставник на Англија во најелитното европско натпреварување.

Тотенхем го освои последниот трофеј пред долги 18 години, па вечерва ќе имаат шанса да ја прекинат црната низа што трае од 2007 година кога го освоија Лига купот. Во меѓувреме, Манчестер Јунајтед имаше поголем успех, освојувајќи домашни купови во последните години.

Финалето на Лига Европа е закажано за вечерва од 21:00 часот на стадионот „Сан Мамес“ во Билбао. Атмосферата во баскискиот град веќе врие од синоќа, кога се случија жестоки навивачки судири. Главен судија на натпреварот е Германецот Феликс Цвајер.