Голман од деветта англиска лига одби да стане крал на Уганда, круната ја препушти на друг

Џорџ Дезмонд Камураси е обичен голман и капитен на англискиот аматерски клуб Саут Ист Донс, но неодамна доби неверојатна животна можност.

Овој 36-годишник, на соиграчите познат како Биг Џи, всушност потекнува од кралското семејство Тооро во Уганда.

Неговиот помлад братучед Ојо – тогашниот владетел – ненадејно починал кон крајот на август, што го поттикнало Комитетот за наследување на тронот да започне постапка за избор на нов владетел.

Комитетот го посочил искусниот англиски голман како главен кандидат за преземање на тронот во Уганда.

Иако кралот нема вистинска политичка моќ, оваа улога е од суштинско значење за културниот и општествениот живот во земјата.

Исправен пред голема дилема, Камураси побарал дополнително време за да се консултира со сопругата и со деловните партнери во Лондон.

Кралскиот комитет не сакал да чека неодредено време на неговата конечна одлука, па англискиот аматер на крајот го одбил тронот.

„Поради лични обврски, не можам да ја преземам таа одговорност“, изјави Камураси, препуштајќи му ја круната на Едвард Рукиди Киџанангома.

Човекот кој можеше да биде крал на Уганда сега се враќа на своето секојдневие во Лондон и брани во деветтиот ранг на англискиот фудбал.

Клубот за кој настапува, Саут Ист Донс, игра во Премиер дивизијата на Источната лига на јужните окрузи, каде што настапуваат клубови од Кент и Југоисточен Лондон. Тоа е деветто ниво во англискиот фудбал, а клубот лани бил втор во својата лига во десеттото ниво и преку плејоф се искачил ранг погоре.