Гордон најстар, Мора најмлад учесник на Светско – Израмнет рекордот на Бора Милутиновиќ

ФИФА соопшти дека сите 48 репрезентации што учествуваат на Светското првенство испратиле конечни списоци со по 26 играчи и нагласи дека промените се можни само во случај на сериозни повреди.

Секоја репрезентација ќе има можност да замени играч во случај на сериозна повреда, но најдоцна 24 часа пред нивниот прв натпревар во групната фаза.

ФИФА истакна дека шкотскиот голман Крег Гордон е најстариот играч на турнирот со 43 години и 162 дена, а дека најмладиот е Мексиканецот Хилберто Мора со 17 години и 240 дена.

Светската фудбалска федерација потсети и дека мексиканскиот голман Гиљермо Очоа (40) и капитените на Португалија и Аргентина, Кристијано Роналдо (41) и Лионел Меси (38), учествуваат на рекордното шесто Светско првенство, нешто што досега никој не го направил. Сите тројца учествуваа на истите Мундијали почнувајќи од она во 2006, па 2010, 2014, 2018, 2022 и сега во 2026.

Исто така, ФИФА истакна дека селекторот на Гана, португалскиот стратег Карлуш Кејрош (73), ќе учествува на петтото Светско првенство по ред, со што го израмни рекордот на српскиот стручњак Велибор Бора Милутиновиќ.

Кејрош ја предводеше Португалија во 2010, Иран во 2014, 2018 и 2022, а сега ќе седи на клупата на Гана.

Милутиновиќ го предводеше Мексико во 1986, Костарика во 1990, САД во 1994, Нигерија во 1998 и Кина во 2002.