Ибрахимовиќ за судирот меѓу Де Пол и Левандовски: Да бев јас, ќе го удрев со глава

Натпреварот во МЛС-лигата меѓу Чикаго Фајр и Интер Мајами донесе тензија на теренот, каде што се соочија некои од најголемите ѕвезди на светскиот фудбал. За Интер Мајами настапија Лео Меси, Луис Суарес и Касемиро, додека Роберт Левандовски го предводеше нападот на Чикаго.

Домаќините поведоа уште во десеттата минута со голот на Левандовски. Касемиро израмни на 1:1 во 48-мата минута, кратко по почетокот на второто полувреме.

Главниот инцидент се случи во 89-тата минута. Роберт Левандовски падна во шеснаесетникот по контакт со играчот на Мајами, Иан Фреј, но судијата не досуди пенал и играта продолжи.

По одлуката на судијата, неколку играчи на Интер го опколија 38-годишниот полски напаѓач. Родриго де Пол, соиграчот на Меси од аргентинската репрезентација, го турна Левандовски, кој на провокацијата реагираше со насмевка. Сепак, Де Пол не застана тука.

Според видеоснимките, Де Пол продолжи да упатува навреди кон најдобриот стрелец во историјата на полската репрезентација. Наводно, тој викал: „Кој се мислиш дека си, идиоте?! Јас двапати ја освоив Копа Америка и Светското првенство – а ти?“

Левандовски остана смирен, а токму таа мирна реакција го привлече вниманието на Златан Ибрахимовиќ. Поранешниот шведски напаѓач е познат по својот жесток темперамент и по тоа што во текот на кариерата не избегнувал физички пресметки. 

Ибрахимовиќ директно коментираше што би направил тој во таква ситуација.

„Левандовски остана крајно смирен. Да бев на негово место, ќе го удрев Родриго де Пол со глава“, рече тој.