Инцидент во Англија: Навивач му удри шлаканица на играч

На натпреварот помеѓу Портсмут и Кардиф, кој се играше вчера во рамките на 5-тото коло од Чемпионшип, се случи инцидент во кој гостинскиот играч Кристијан Биелик влезе во физичка пресметка со млад навивач. Сето тоа се случи во 70-тата минута на стадионот Фратон Парк, кога Портсмут водеше со 2:0. Натпреварот заврши со тој резултат.

Поранешниот ученик на фудбалската академија на Арсенал се обиде да ја добие топката што заврши на трибините. Видеото од инцидентот покажува дека навивачот ја фрла топката подалеку од него, на што Биелик реагира фаќајќи го навивачот за врат и туркајќи го. Младиот навивач потоа стана и се обиде да возврати.

Натпреварот беше накратко прекинат, а навивачот кого Биелик го зграби за врат беше отстранет од стадионот. Биелик не беше санкциониран.

Тренерот на Кардиф, Брајан Бери-Мерфи, рече дека навивачот го удрил Биелик и ја пофали реакцијата на судијата.

„Сакав да проверам дали е заштитен и дали е добро, и беше. Судијата и неговите помошници се справија со ситуацијата беспрекорно, според мене. Тој рече дека јасно видел што се случило, ги смирил сите и ја спровел правилната постапка. Играчите постојано се изложени на неприфатливи ситуации“, рече тој.

Менаџерот на Портсмут, Џон Мусињо, им се извини на Кардиф и нивните играчи.

„Судијата објасни дека настанала тензија кога Кристијан тргнал по топката и еден навивач го удрил. Не беше убаво да се види тоа. Само што го видов и е добро, но тоа не е важно, вакви работи не треба да се случуваат. Сакаме да создадеме вжештена атмосфера на Фратон Парк, во што успеавме во последните години. Понекогаш се преминува границата, го разбирам тоа, но не мислам дека има потреба од вакви сцени. Им се извинуваме на играчите и на Кардиф и ќе направиме сѐ што можеме за да се осигураме дека ова нема да се повтори.“