Откако беше одлучено натпреварот на Светското фудбалско првенство 2026 меѓу Иран и Египет да се одигра во чест на ЛГБТК+ популацијата, двете држави презедоа први официјални чекори за тоа да не се случи.
Големо внимание привлече информацијата дека натпреварот во Сиетл идното лето ќе биде означен како ЛГБТК+ „Pride Match“, бидејќи вклучува две земји каде што хомосексуалноста е нелегална.
Локалниот организациски комитет во Сиетл, еден од градовите домаќини на Светското првенство, соопшти дека натпреварот на стадионот Lumen Field на 26 јуни ќе биде одржан во знак на поддршка на ЛГБТК+ заедницата.
Овој план бил усвоен пред жрепката за парови и групи, па не се знаело кои екипи ќе играат во рамките на тој посветен натпревар. Но, судбината се погрижи токму Иран и Египет да се најдат во таа категорија.
Меѓутоа, официјалните лица на ФИФА би можело да бидат принудени да го преместат натпреварот од групната фаза поради жалбите на двете земји во однос на ЛГБТК+ тематиката.
Мехди Тај, претседател на Иранската фудбалска федерација, официјално потврди дека иранската и египетската страна испратиле дописи со кои се противат на ваквиот настан.
„И Египет и ние се спротивставивме, бидејќи овој потег е неразумен и нелогичен, а суштински означува поддршка на одредена група. Мораме да ја решиме оваа ситуација“, изјави Тај.
Сè уште не е познато како точно ќе изгледа тој натпревар и што имаат намера организаторите. Се очекува фудбалерите да носат симболи на ЛГБТК+ заедницата, како боите на виножитото, а рекламите покрај теренот да бидат посветени на оваа популација.
Тешко е да се очекува дека Иран и Египет целосно ќе го одбележат настанот на начин како што е предвидено.
