Префектот на Рим, Ламберто Џанини, нареди Дербито дела Капитале, првично закажано за в недела, да се помести за понеделник за да се избегне судир со финалето на Отвореното првенство на Италија во тенис, одлука што веројатно ќе резултира со презакажување на уште четири лигашки натпревари.
Дербито дела Капитале помеѓу Рома и Лацио, првично закажано за недела, 17 мај во 12:30 часот, е поместено за понеделник, 18 мај, со почеток во 20:45 часот.
Тоа е одлука донесена од страна на римскиот префект поради безбедносни причини.
Имено, финалето на Италија опен е закажано за в недела на стадионот „Чентрале дел Тенис“ во спортскиот комплекс „Форо Италико“, во кој спаѓа и стадионот „Олимпико“, а се очекува да присуствуваат повеќе од 20.000 навивачи. Поради безбедносни причини, италијанските власти одлучија да го променат датумот на дербито. Италијанската полиција и редарите очигледно не се во можност истовремено да ги обезбедуваат двата настана, а особен ризик е фактот што може да дојде до судири меѓу навивачките групи на Рома и Лацио.
Областа околу „Олимпико“ ќе биде пешачка, но за разлика од вообичаеното, сообраќајот нема да може да влегува од „Виа деи Гладиатори“ (страната на трибината Курва Суд), која е затворена поради Италија опен. Затоа, сите ќе мора да поминат низ областа кај обелискот. Накратко, значаен проблем.
Од друга страна, ова е веројатно добра вест за навивачите на Рома и Лацио кои негодуваа поради лошиот термин за ова дерби. Негодуваше и Маурицио Сари, тренерот на Лацио, кој критикуваше дека миланското дерби Интер - Милан никогаш не се игра во лош термин на пладне.
Одлуката на префектот на Рим претставува значаен проблем за Лега Серија А, со оглед на тоа што последните две кола од сезоната мора да се играат истовремено за клубовите што се борат за истата цел.
Ова е проблем што лесно можеше да се избегне: ќе беше доволно да се примени различен критериум на компјутерот што ги прави распоредите на Серија А: „Нема Рома - Лацио во 37. коло.“
Дури и претседателот на Италијанската тенис и падел федерација (ФИТП), Анџело Бинаги, ја нагласи оваа поента: „Одложување на дербито во Рим? Дека финалето ќе се игра на тој ден во тоа време се знае веќе две години. Верувам дека ова би можело да биде вистинското време фудбалот да сфати дека, за доброто на своите навивачи, треба да го организира првенството земајќи предвид дека во Рим се игра Италија опен, а АТП финалето во Торино.“
Во овој случај, Рома, Милан, Јувентус, Наполи и Комо сè уште се борат за место во Лигата на шампионите, што значи дека сите мора да играат во исто време.
Технички, Лега Серија А исто така ќе ги помести тие натпревари во понеделник од 20:45 часот, но официјална одлука сè уште не е донесена.
Јувентус во следното коло ќе биде домаќин на Фиорентина, Милан ќе патува кај Џеноа, Наполи ќе гостува во Пиза, а Комо ќе биде домаќин на Парма.
