Хаос во Јужна Америка: Крвава пресметка на хулигани – дете претепано со шипка, има и мртви?

Невидено насилство го одбележа натпреварот во Буенос Аирес помеѓу Индепендиенте и Универсидад де Чиле.

Станува збор за реванш од осминафиналето на Копа Судамерикана, кој не беше завршен поради дивеењето на навивачите на трибините. Прекинот се случи во текот на второто полувреме кога ситуацијата ескалираше. Резултатот бешпе 1:1, а чилеанскиот тим водеше со вкупни 2:1.

Сè започна во текот на првото полувреме кога гостинските навивачи, кои беа сместени во горниот дел од трибината над домашната екипа, фрлаа столчиња, експлозивни направи, камења… според сведоштвата на навивачите на Индепендиенте.

Спикерот ги повика Чилеанците да го прекинат тоа, додека домашната екипа ги напушти своите места, некои од нив крвави. Потоа следеше реакција на „Бара брава“, навивачка група на Индепендиенте, позната по своето насилно однесување. Тие преминаа од другата страна на стадионот и влегоа на трибината каде што беа стационирани Чилеанците. Следеше насилство кое траеше неколку минути.

Гостинските навивачи, кои ја обвинуваат другата страна за инцидентот откако украдоа едно од нивните знамиња, предоцна беа евакуирани. На горното ниво избувна масовна тепачка, пожари избувнаа на неколку места, додека автобусот на тимот на Универсидад беше уништен.

Аргентинските хулигани не бираа кого да тепаат, па на видеата и фотографиите може да се види како еден од нив удира дете со стап.

Иако официјалните лица во среда вечерта објавија дека нема мртви, според неофицијални извори, тројца од нив ги загубиле животите. Повредените се пребројани, додека повеќе од 300 лица се уапсени.