Португалија ја освои Лигата на нации победувајќи ја Шпанија по изведувањето на пенали.
Регуларниот дел заврши со нерешен резултат 2:2. Баскиското дуо Мартин Зубименди и Микел Ојарзабал постигнаа голови за Шпанија, додека Нуно Мендеш и Кристијано Роналдо постигнаа голови за Португалија. Така, Португалија стана првата екипа во историјата што двапати ја освоила Лигата на нации.
Со оваа победа, Португалија освои и богата награда. УЕФА му доделува на победникот на Лигата на нации дури 8,25 милиони евра за освојување на натпреварувањето, додека Шпанците ќе добијат 6,75 милиони евра како финалисти. Третопласираната Франција заработи 5,75 милиони, а Германија доби 4,75 милиони евра.
Ова беше вкупно четврто финале на Португалија и нејзина трета прослава. Покрај двата освоени трофеја во Лигата на нации (2025, 2019), Португалците беа и европски шампиони во 2016 година. Тие играа и во финалето на ЕУРО во 2004 година, но загубија дома од Грција.
