Крваво римско дерби: Над 20 полицајци повредени во судирите меѓу навивачите на Лацио и Рома

Градоначалникот на Рим, Роберто Гуалтиери, изјави дека повеќе од 20 полицајци се повредени во судирите со навивачите во пресрет на Дерби дела Капитале натпреварот од Серија А меѓу Лацио и Рома, кој се одигра пред два дена во Рим, објави денеска AP.

Италијанските медиуми потсетуваат дека околу стадионот „Олимпико“ во Рим биле распоредени околу 2.000 полицајци. Судирот започна кога навивачите на Лацио се обидоа да го пробијат полицискиот кордон. Навивачите на „Бјанкочелестите“ фрлаа ракети и тврди предмети кон италијанските полицајци.

Полицијата одговорила со солзавец и водени топови. Италијанските медиуми јавуваат дека во овие судири се повредени 24 полицајци, а причинета е материјална штета од 40.000 евра.

„Згрозен сум. Неприфатливо е хулиганите да трансформираат фудбалски натпревар во сцена на урбана војна“, рече Гуалтиери.

Претставниците на двата римски клуба изразија солидарност со повредените полицајци и го осудија насилството.

Инаку, натпреварот заврши без победник, 1:1. Поведе Лацио преку дефанзивецот Алесио Ромањоли во 47. минута, а израмни Аргентинецот Матиас Соуле во 69-тата.