Финалето на Светското првенство меѓу Шпанија и Аргентина нема да биде само битка за титулата светски шампион, туку и пресметка на најсилните фудбалски лиги и клубови. А, кога ќе ги погледнете составите на двата финалиста, едно е јасно: шпанската Ла Лига апсолутно доминира.
Од 52 играчи што ќе им бидат на располагање на селекторите во финалето на стадионот „МетЛајф“ во Њу Џерси, дури 24 играат во шпанската Ла Лига, речиси половина од сите учесници во финалето. Тоа не е изненадување со оглед на тоа што еден од финалистите е Шпанија, но и Аргентина има фудбалери во оваа лига.
Премиер лигата е далеку зад неа, со 13 претставници во големото финале, додека другите лиги се значително помалку застапени.
Особено е интересно што само тројца играчи доаѓаат од аргентинскиот шампионат, Николас Отаменди и Гонсало Монтиел од Ривер Плејт, како и Леандро Паредес од Бока Жуниорс.
Најголем придонес во финалето има мадридски Атлетико, кој има дури 9 играчи во репрезентациите на Аргентина и Шпанија и тоа Хуан Мусо, Науел Молина, Тиаго Алмада, Џулиано Симеоне и Хулиан Алварес од едната, а Марк Пубиљ, Алекс Грималдо, Маркос Љоренте, Алекс Баена на другата страна. Интересно е што клубот на Диего Симеоне има повеќе претставници меѓу Аргентинците (5) отколку во шпанската репрезентација (4).
Веднаш зад Атлетико е Барселона, со 8 играчи, сите од шпанската репрезентација: Жоан Гарсиа, Пау Кубарси, Ерик Гарсиа, Педри, Гави, Дани Олмо, Ламин Јамал и Феран Торес.
По тројца играчи во финалето имаат Арсенал (Давид Раја, Мартин Зубименди и Микел Мерино), Атлетик (Унаи Симон, Ајмерик Лапорт и Нико Вилијамс) и Тотенхем (Кристиан Ромеро, Маркос Сенеси и Педро Поро).
Интер Мајами (Лионел Меси и Родриго де Пол), Ривер Плејт (Николас Отаменди и Гонсало Монтиел), Ливерпул (Алексис Мак Алистер и Виктор Муњос) и Олимпик Марсеј (Херонимо Ружи и Факундо Медина) имаат по двајца претставници.
По еден претставник имаат Астон Вила (Емилиано Мартинес), Манчестер Јунајтед (Лисандро Мартинес), Лион (Николаа Таљафико), Бока Жуниорс (Леандро Паредес), Челси (Енцо Фернандес), Стразбур (Валентин Барко), Баер Леверкузен (Ексекиел Паласиос), Комо (Нико Пас), Бетис (Џовани Ло Селсо), Јувентус (Нико Гонсалес), Интер (Лаутаро Мартинес), Палмејрас (Хосе Мануел Лопес), Реал Мадрид (Марк Кукуреља), Манчестер Сити (Родри), Пари Сен-Жермен (Фабиан Руис), Кристал Палас (Јереми Пино) и Реал Сосиедад (Микел Ојарсабал).
Исто така е интересно да се забележи дека клубовите што ја освоија Лигата на шампионите во последните години имаат изненадувачки мало влијание врз финалето на Светското првенство. Гледајќи ги победниците на елитното европско натпреварување во последната деценија, само неколку од нивните играчи се меѓу финалистите. Ливерпул ги има Алексис Мак Алистер и Виктор Муњос, Пари Сен-Жермен го има Фабиан Руис, Манчестер Сити го има Родри, Челси го има Енцо Фернандес, додека Реал Мадрид го има штотуку потпишаниот Марк Кукуреља.
