Лекција по возење од Верстапен во Сузука

Холанѓанецот Макс Верстапен славеше на патеката „Сузука“ во трката за Големата награда на Јапонија, и со тоа ја постигна првата победа сезонава.

Актуелниот светски шампион по вчерашната пол-позиција го задржа водството од квалификациите и рутински победи на трката за Големата награда на Јапонија.

Зад себе го остави дуото на Мекларен, Ландо Норис и Оскар Пјастри, додека четвртата позиција му припадна на возачот на Ферари, Шарл Леклер.

Потоа дојде дуото од Мерцедес, Џорџ Расел и Кими Антонели, додека Луис Хамилтон ја заврши трката на незадоволителната седма позиција, додека меѓу првите десет се пласираа и Исак Хаџар, Алекс Албон и Оливер Берман.

Клучниот детаљ од трката се случи во 22. круг кога и Верстапен и Норис влегоа во боксот и излегоа практично во исто време, а Норис мораше да оди по тревата и со тоа остана зад Холанѓанецот.

Судиите на патеката ја разгледаа ситуацијата и одлучија дека нема причина да го казнат Холанѓанецот, кој на тој начин ја оствари првата победа во новата сезона.

Следната трка е закажана за седум дена во Бахреин.