Луис Диас го обележа синоќешното дерби на „Паркот на принцовите“. Колумбиецот ги постигна двата гола за Баерн, во 4. и 32. минута, а во финишот на првиот дел со брутален старт го повреди Ашраф Хакими и доби црвен картон.
Десниот бек на ПСЖ во солзи и со помош на лицата од медицинскиот тим на ПСЖ го напушти теренот, а нешто подоцна со помош на патерици замина од стадионот.
Актуелниот европски првак денеска се огласи по повод повредата на Хакими, истакнувајќи дека тој ќе паузира неколку недели.
„Ашраф Хакими страда од тешка повреда на левиот глужд, поради што ќе биде недостапен неколку недели“, соопшти ПСЖ.
📍 Le point médical après Paris - Bayern. @Aspetar
— Paris Saint-Germain (@PSG_inside) November 5, 2025
Француските медиуми пишуваат дека поради степенот на повредата Мароканецот ќе паузира најмалку два месеца.
Доколку прогнозите се точни, ова е лоша вест за тренерот на ПСЖ, Луис Енрике, и селекторот на Мароко, Валид Реграги.
Паузата од два месеца значи дека Хакими ќе го пропушти Африканскиот куп на нации, кој започнува на 21 декември. Неиграњето на капитенот ќе биде голем удар за Мароканците кои имаат најголеми амбиции. Мароко последен пат го освоил АФКОН во далечната 1976 година.
