Македонскиот шампион Љуботен стана првата домашна екипа која минала квалификациско коло во Лигата на шампиони за жени откако на квалификацискиот турнир во Скопје ги сомле двата противника.
Откако минатото лето стана прва македонска женска екипа која остварила победа во европско натпреварување, сезонава Љуботен отиде чекор понатаму. Прво во средата во полуфиналето со 4:1 го среди НСИ Рунавик, шампионот на Фарските Острови, иако губеше 0:1, а синоќа дојде до нова победа.
Имено, вчера се играше финалниот натпревар на Турнирот 3 во рамките на првото квалификациско коло за пласман во Лигата на шампиони за жени на УЕФА. Тетовскиот клуб се соочи со Пјуник, шампион на Ерменија, и оствари убедлива победа од 4:0.
Почетокот не навестуваше таков резултат оти Ерменките притиснаа, но потоа Љуботен покажа дека сепак е поквалитетен тим и покрај тоа што играше без Улза Максути, репрезентативката на Македонија која се повреди на првиот натпревар.
Хероина на Љуботен беше Хава Мустафа, која ги постигна сите четири голови. Бидејќи даде гол и на првиот меч, со вкупно 5 таа е и на делба првото место на листата на најдобри стрелци во првото коло заедно со Кумба Зајнаб Брима од латвискиот шампион Рига.
Сите што настапија за македонскиот шампион оставија одличен впечаток, но мора да се издвои стоперот Милана Рахимова, репрезентативка на Азербејџан, која немаше загубен дуел и ниту еднаш не остави топка да помине крај неа. Иако со само 21 година, на терен делуваше како да е далеку поискусна.
Љуботен сега го чека нов предизвик. Во второто квалификациско коло повторно ќе игра во Турнир 3, но сега тој ќе се игра во Белгија. таму во полуфиналето ќе има танталови маки бидејќи ќе се соочи со силниот шведски шампион Русенгорд од Малме. Натпреварот ќе се игра на 27 август. Победникот во финалниот меч ќе игра против подобриот од дуелот на домаќинот Левен со босанскиот СФК 2000. Поразените исто така ќе играат натпревар, за трето место.
Квалификациите завршуваат со третото коло каде се игра плеј-оф двомеч во септември по кој ќе се добијат сите учесници во лигашката фаза која брои 18 екипи.
