Најдобрата македонска жена фудбалски судија доби голема чест - ќе ја дели правдата на полуфинален натпревар од 10-тото издание на Копа Америка за жени.
Ивана Пројковска доцна вечер од 2:00 часот по полноќ по македонско време ќе го суди натпреварот помеѓу Аргентина и Колумбија, кој ќе го даде првиот финалист на Копа Америка 2025. Мечот се игра на стадионот „Родриго Пас Делгадо“ во Кито, главниот град на Еквадор. Ќе може да се гледа во живо на YouTube каналот на првенството: https://www.youtube.com/@CopaAmerica/streams.
Македонската судијка од почетокот е дел од јужноамериканскиот континентален собир и веќе ги судеше дуелите Перу - Еквадор (1:3), Венецуела - Боливија (7:1) и Чиле - Уругвај (0:3). На Копа Америка се најде благодарение на соработката помеѓу УЕФА и КОНМЕБОЛ во која е вклучена размена на судијки. Така, бразилската судијка Еџина Алвис Бачиста го судеше полуфиналето на штотуку завршеното ЕУРО за жени меѓу Германија и Шпанија.
На Пројковска ќе ѝ помагаат Италијанката Џулиа Темпестили и Шпанката Ирагартсе Фернандес, кои исто така се дел од соработката за размена.
Победникот од Аргентина - Колумбија во големото финале ќе игра со победникот од вториот полуфинален дуел во кој се среќаваат Бразил и Уругвај.
Бразил е бранител на пехарот и со 8 титули е најтрофејна нација на Копа Америка. Само Аргентина во 2006 успеа да откине една титула, а на сите останати изданија триумфираа Бразилките.
