Меси е шампион на МЛС, го однесе Интер Мајами до првата историска титула

Лионел Меси успеа и во Соединетите Американски Држави! Го предводеше својот Интер Мајами до историска, прва титула во МЛС шампионатот (најсилната лига во северноамериканскиот фудбал што ги вклучува САД и Канада).

Фудбалерите на Интер Мајами го победија Ванкувер Вајткепс со 3:1 во финалето синоча и со тоа ја освоија првата титула во историјата на франшизата.

Интер Мајами поведе во финалето кое се играше на стадионот „Чејс“ во Форт Лодердејл со автогол на Едиор Окампо во 8. минута и тоа беше резултатот од првото полувреме.

Но, работите се вратија во нормала со гол за 1:1 во 60-тата минута, на разочарување на повеќето домашни навивачи во Флорида.

Сепак, клучниот момент се случи во 71. минута кога Родриго Де Пол ја искористи асистенцијата на Лионел Меси и му донесе победа и титула на Интер Мајами.

Самиот Меси ја одзеде топката од противниците, асистираше во просторот со додавање до Де Пол, а поранешната ѕвезда на Атлетико Мадрид рутински ја погоди мрежата на Канаѓаните.

Конечниот резултат го постави Тадио Аљенде длабоко во судиското продолжение, по уште една одлична асистенција од Меси.

Така, Интер Мајами ја освои првата шампионска титула во историјата на МЛС. На патот до финалето Интер Мајами ги елиминираше Нешвил (2:1), Синсинати (4:0) и Њујорк Сити (5:1). Регуларниот дел од првенството го заврши на 4. место во Источната конференција со 65 бодови, исто колку и второпласираниот Синсинати, а само еден помалку од лидерот Филаделфија Јунион.

До титулата го водеа големи ѕвезди кои пристигнаа од Европа, имено Лионел Меси, Луис Суарес, Жорди Алба, Серхио Бускетс и Родриго Де Пол.

Тимот го предводи уште еден познат Аргентинец, Хавиер Масчерано, а еден од сопствениците е Дејвид Бекам. Да нагласиме и дека ова беше последниот натпревар во кариерата на Жорди Алба, а се збогува со фудбалот со трофеј.

Што се однесува до самата МЛС, најтрофејниот тим со 6 титули е Лос Анџелес Галакси, по што следуваат ДиСи Јунајтед со 4 и Колумбус Кру со 3. Интер Мајами стана 16-тиот тим со шампионски трофеј во МЛС.

Интер Мајами - Ванкувер Вајткепс 3:1
8' (аг) Едиор Окампо, 71' Родриго Де Пол, 90'+6 Тадио Аљенде - 60' Али Ахмед