Македонската репрезентација синоќа разочара играјќи без голови на пријателската со Латвија, но селекторот Благоја Милевски е задоволен од изданието на фудбалерите.
„Сè што си поставивме како цел за овој натпревар, освен победата, беше исполнето. Сакав да видам како ќе изгледа екипата во нова формација, со нови тактички задачи и во ситуации на кои досега не сме работеле. Од таа перспектива сум навистина задоволен. Жал ми е што условите за игра не беа подобри. Се надевам дека наскоро ќе се направат напори да играме на поквалитетен терен, за да бидеме поефикасни во завршницата. Во тие последни моменти, во третата фаза од нападот, кога противникот е поставен во густ блок, потребно е прецизно завршно додавање, а денес против Латвија тоа го немавме. И покрај тоа, создадовме неколку шанси, но не успеавме да ги реализираме. Честитки за двата тима, и за Македонија и за Латвија. Задоволен сум, сите фудбалери, без разлика дали се стандардни или влегуваат од клупа, ја оправдаа довербата. Тоа ми дава сигурност дека можам да сметам на секој од нив“, изјави селекторот.
Ова беше прв пат Македонија да не ја победи Латвија оти во претходните пет натпревари имаше забележано исто толку победи, со што и против оваа репрезентација го расипа 100-процентниот скор (во октомври го расипа и со Казахстан).
Следниот предизвик за „Рисовите“ е Велс на гости, последен меч од квалификациите за пласман на Мундијалот 2026 и директна битка за второто место кое води во баражот. Се игра во вторник од 20:45 часот во Кардиф.
