Сè погласни се повиците Австралија да им даде азил на иранските фудбалски репрезентативки откако тие беа етикетирани како „воени предавници“ на државната телевизија и треба да бидат „строго третирани“ за нивниот храбар гест на Азискиот куп. Одбивањето на тимот да ја пее иранската химна пред натпреварот во понеделникот против Јужна Кореја предизвика остри критики, а еден презентер на иранската државна телевизија рече дека фудбалерките мора да се соочат со „стигмата на срамот и предавството“, објавува Daily Mail.
Мохамед Реза Шахбази, водител на емисијата Footnote и тврдокорен гласноговорник на режимот, рече дека властите треба да ги прогласат за предавници. Во Иран, предавството е кривично дело казниво со смрт.
„Ќе кажам само едно: предавниците мора да бидат построго третирани во воено време“, рече Шахбази, според превод објавен на платформата X.
„Секој што ќе направи нешто против земјата во воени услови мора да биде построго казнет. На пример, случајот со нашата женска фудбалска репрезентација што не ја испеа националната химна, објавената фотографија и сè друго, за што нема да зборувам детално.“
„И јавноста и властите мора да ги сметаат овие лица за 'воени предавници'“, додаде тој. „Тоа не треба да се смета за едноставна жалба или симболичен гест. Белегот на срам и предавство мора да им остане на челата и со нив треба да се постапи дефинитивно и строго.“
Националната репрезентација и нивната селекторка Марзие Џафари стоеја во тишина во понеделникот додека се свиреше националната химна, што се смета за тивок протест против исламскиот режим. Гестот дојде само два дена по атентатот врз врховниот лидер, ајатолахот Али Хамнеи, во американско-израелски напад.
Се наведува дека фудбалерките не можеле да стапат во контакт со своите семејства поради прекин на интернет конекциите низ целата земја. Сепак, пред натпреварот во четвртокот против австралиската репрезентација, во кој загубија со 4:0, тимот и тренерскиот персонал ја пееја националната химна. Некои коментираа дека фудбалерките се „заложнички на режимот“.
„Овие храбри и мирољубиви фудбалерки се во опасност. Режимот им се закани дека ќе ги принуди да ја пеат националната химна. Ве молам бидете нивниот глас“, коментираше еден ирански Австралијанец онлајн. Друг изјави за AAP: „Мислам дека фудбалерките се заложнички на исламскиот режим, кој се обидува да ги нормализира злосторствата извршени против иранскиот народ“.
The Iranian women’s national football team refused to sing the anthem of the Islamic Regime. Tonight. At the opening match of the Asian Cup. In front of the entire world.
— Samantha Smith (@SamanthaTaghoy) March 3, 2026
So, to all liberal Western women:
Watch and learn.
THIS is what real feminism looks like. pic.twitter.com/SriXGbipsY
Поради сето погоре наведено, има сè погласни повици до владата на премиерот Ентони Албанезе итно да интервенира и да им помогне на фудбалерките пред да мора да се вратат во Иран. Во објава на социјалните мрежи упатена до министерката за надворешни работи Пени Вонг, иранскиот новинар Али Борнеи рече дека владата треба да им додели итен азил на жените бидејќи тие се „во непосредна опасност“.
„Овие спортистки се соочуваат со произволно апсење и егзекуција ако бидат принудени да се вратат“, рече Борнеи. „Австралија не смее да им дозволи да се вратат во режим кој го третира тишиот протест како злосторство казниво со смрт со бесење.“
Премиерот Ентони Албанезе и министерот за внатрешни работи Тони Бурк беа исто така споменати во бројни најави.
„Ве молиме, направете нешто. Не можеме да им дозволиме на овие млади жени да се вратат во земјата каде што ќе бидат уапсени и евентуално брутално мачени. Ве молиме дајте им азил“, коментираше еден корисник.
„Сенаторке Вонг, ве молиме, направете нешто пред да им се случи нешто на овие девојки“, напиша друг.
Пензионираниот австралиски фудбалер и активист за човекови права Крег Фостер, исто така, ја повика ФИФА, управното тело на фудбалот, да интервенира.
„Иранските фудбалерки имаат уште еден натпревар за играње на овој турнир. Заканата за нив и нивните семејства дома не завршува со последниот свиреж на судијата. Историјата нè научи на тоа“, рече Фостер.
„ФИФА и Азиската фудбалска конфедерација мора да издадат јасна јавна изјава со која ќе потврдат дека секој играч што се натпреварува под нивна јурисдикција има безусловно право на каква било реакција, или недостаток на реакција, на сопствената национална химна.“
