Нејмар не можеше да настапи за Сантус во победата од 2:0 над Атлетико Минеиро во првиот натпревар од четвртфиналето на Копа Судамерикана, но сепак стана една од главните теми на разговор по мечот.
Бразилската ѕвезда го следеше натпреварот од трибините на стадионот „Вила Белмиро“, каде што влезе во вербална расправија со навивачите на гостинскиот тим.
На видеото што кружи на социјалните мрежи, може да се види како Нејмар разговара со навивачите на Атлетико Минеиро. Бразилскиот медиум UOL пренесува дека тие го провоцирале, нарекувајќи го „слаб“ и велејќи дека „нема колено“ – алузија на бројните повреди што ја одбележаа подоцнежната фаза од неговата кариера. Нејмар возвратил: „И со повредено колено играм подобро од целиот ваш тим“.
Истото видео и изјава беа објавени од неколку големи бразилски медиуми, вклучувајќи ги Globo и CNN Brasil. Иако не се слуша јасно сè што навивачите му довикувале на Нејмар, неговиот одговор се слуша гласно и јасно.
Откако видеото стана вирално, Нејмар се огласи на Instagram за да ја објасни својата гледна точка за ситуацијата.
„Провокацијата е дел од фудбалот. Тие упатуваат навреди оттаму, јас возвраќам од овде и сè е во ред“, напиша Нејмар, додавајќи дека имало меѓусебно задевање и смеа, и нагласувајќи дека ги почитува сите клубови.
Тој исто така се потсети на деновите кога играчи како Едмундо, Виола, Пауло Нунес и Едилсон беа познати по провокациите и ривалството, наведувајќи дека овој аспект на фудбалот не му пречи.
Сантус го победи Атлетико Минеиро со 2:0 без својата најголема ѕвезда. Вилијан Арао постигна гол во 31. минута, а Кристијан Олива во 68. минута, додека Габигол беше асистент за двата погодока. Реваншот се игра на 16 септември во Бело Оризонте, а пораз со разлика од еден гол би бил доволен за Сантус да се пласира понатаму.
Нејмар не настапи поради повреда на мускулот на десната нога, здобиена на натпреварот против Палмеирас. Сантус соопшти дека станува збор за повреда од втор степен (тип Б) на мускулот rectus femoris, а бразилските медиуми проценуваат дека тој би можело да отсуствува од терените еден до два месеци. Следствено на тоа, се очекува тој да го пропушти и реванш-натпреварот против Атлетико-МГ.
