Легендарниот фудбалер и поранешен тренер на Манчестер Јунајтед, Рајан Гигс, откри неверојатна приказна за тоа како англискиот гигант ја пропуштил можноста да го ангажира Килјан Мбапе во 2015 година.
Во тоа време Гигс беше дел од стручниот штаб на Луи ван Хал, а до информации за талентираниот Французин дошол на сосем неочекуван начин додека бил на одмор во Јужна Франција.
„Шетав по плажата кон хотелот кога ми пријде еден човек по име Лионел; ми кажа дека го следи младинскиот фудбал и инсистираше да погледнам еден играч на Монако по име Килјан Мбапе“, се присети Велшанецот во поткастот на Рио Фердинанд.
Неколку недели подоцна, Гигс добил е-меил со целосни информации за младиот фудбалер, по што тој и неговиот колега Алберт Стајвенберх (сега е помошник во Арсенал) гледале снимки од неговите настапи.
„Гледавме неколку натпревари на младинскиот тим на Монако и нашата реакција беше: 'Леле, што е ова?'“, истакна Гигс, нагласувајќи дека Мбапе уште тогаш изгледал исклучително посебно.
Воодушевените тренери веднаш ја пренеле информацијата до скаутската служба на „Црвените ѓаволи“.
Скаутите на клубот од „Олд Трафорд“ потоа отпатувале во Париз за да го видат младиот напаѓач на дело против ПСЖ.
Сепак, стручњаците за проценка на таленти воопшто не биле импресионирани од она што го виделе на теренот.
„Ги прашав како поминаа, а тие рекоа дека не се целосно убедени во неговите квалитети, па се откажавме од трансферот и тоа беше сè“, додаде Гигс осврнувајќи се на големиот пропуст на Јунајтед.
Набргу потоа, Мбапе стана вистинска сензација во Монако, премина во ПСЖ, ја освои светската титула со Франција во 2018, а денес – како еден од најдобрите фудбалери во светот – го носи дресот на Реал Мадрид.
