Норвешка го израмни рекордот на Македонија, на Халанд му фалеше еден гол

Норвешка ја победи Молдавија со 11:1, израмнувајќи ја втората најубедлива победа во мундијалските квалификации во Европа, додека Ерлинг Халанд го запечати триумфот со 5 гола и 2 асистенции.

Му недостигаше еден гол за да го израмни рекордот на Австриецот Ханс Кранкл, кој постигна шест гола во еден натпревар против Малта (9:0) во 1977 година и го држи европскиот рекорд. Халанд можеше да шутира пенал во 79-тата минута, но му остави на Тело Осгорд за да прослави хет-трик. Осгорд потоа постигна и четврти гол.

Напаѓачот на Манчестер Сити стана најдобар стрелец во европските квалификации со 9 голови, а достигна и неверојатна бројка од 48 голови на 45 натпревари за својата репрезентација.

Тоа е просек од 1,07 голови по натпревар, што го става на петтото место меѓу најефикасните фудбалери за националниот тим во однос на фреквенцијата на постигнување голови, зад Герд Милер (Западна Германија, 68/62, 1,09), Шандор Кочиш (Унгарија, 75/68, 1,10), Паул Нилсен (Данска, 52/38, 1,37) и Вивиан Вудворд (Англија, 75/53, 1,42).

Норвешка е исто така најефикасната репрезентација во квалификациите за Светското првенство од Европа, постигна 24 голovi на пет натпревари и е убедлив лидер во групата со 15 бодови, пред Италија со 9 (натпревар помалку), која убедливо ја победи на домашен терен со 3:0.

Норвежаните сонуваат за настап на Светско првенство од 1998 кога последен пат беа на светскиот собир во Франција. Имаат вкупно 3 учества, освен во 1998 беа и во 1994 во САД и во далечната 1938 исто така во Франција.

Највисоки победи во европските мундијалски квалификации:

Германија - Кипар 12:0 (1969)
Норвешка - Молдавија 11:1 (2025)
Лихтенштајн - Македонија 1:11 (1996)
Унгарија - Грција 11:1 (1938)
Финска - СССР 0:10 (1957)