Пеп искрен: Судбината повеќе не е во наши раце

Фудбалерите на Манчестер Сити синоќа направија голем кикс во борбата за шампионската титула во англиската Премиер лига.

Тимот на Жузеп Гуардиола во 35-тото коло ремизираше 3:3 со Евертон, оставајќи ги „Граѓаните“ зо загубени два бода во ловот на Арсенал и покрај тоа што имаат натпревар помалку.

На крајот Сити дури и треба да биде задоволен со бодот оти до 83. минута губеше 3:1, а головите на Ерлинг Халанд во таа минута и на Жереми Доку во 90+7 спасија бод.

По натпреварот, тренерот на Сити, Пеп Гуардиола, рече дека ќе продолжат да се подобруваат, но призна дека „нивната судбина сега не е во нивни раце“.

„Одигравме навистина добро прво полувреме. Во второто полувреме се искачија на повисоко ниво. Им дадовме гол, но откако се вратија во игра, го направија вистински англиски натпревар, со толку многу агресија во дуелите. Но, генерално игравме многу добро“, рече тој.

Каталонецот нагласи дека ќе продолжат да се борат додека не е готово.

„Гостувањата кај Евертон секогаш се тешки. Сега нашата судбина повеќе не е во наши раце. Имаме уште четири натпревари и ќе видиме што ќе се случи“, заклучи тој.

Ова е голем неуспех за Сити, кои се пет бода зад Арсенал со натпревар помалку, што значи дека „Топчиите“ сега имаат сè во свои раце.