Пеп му честиташе на Ливерпул: Ни бегаат милијарда бодови, фантастичен тим се

Менаџерот на Манчестер Сити му честиташе на Ливерпул за рекордната 20-та титула во англиската Премиер лига по убедливиот триумф над Тотенхем на „Енфилд“ во 34. коло.

Манчестер Сити славеше во полуфиналето на ФА купот на „Вембли“ со 2:0 против Нотингем Форест, благодарение на Рико Луис и Јошко Гвардиол, кои му ја донесоа победата на својот тим и му дадоа последна шанса да освои трофеј сезонава.

Минатата година „Сините“ загубија од Манчестер Јунајтед со 2:1 во финалето, но по полуфиналната победа над Нотингем Форест, Жузеп Гуардиола не зборуваше за својот тим, туку за титулата на Ливерпул.

„Во мое име и во име на целиот клуб сакаме да им честитаме на Ливерпул за победата и титулата во Премиер лигата. Заслужено, нема сомнение за тоа. Фантастичен тим. Во текот на следната година, како што се случи во последните четири години со Сити, тие ќе се обидат да ја задржат титулата и се надеваме дека следната сезона ќе бидеме подобри, да се натпреваруваме до крајот за титулата. Оваа сезона тоа не беше можно. Затоа, честитки до Ливерпул“, рече Пеп.

Сити е четврти на табелата во Премиер лигата со 61 бод, а првите пет од Англија ќе се квалификуваат за Лигата на шампионите.

„Не, оваа сезона не беше добра. Заостануваме милијарда бодови зад Ливерпул (всушност точно 21). Не е добро. Погледнете ја Лигата на шампионите. Дали победивме на еден натпревар? Два натпревара? Не бевме добри. Клубот мора да ги донесе правилните одлуки ова лето за да ја направи следната сезона подобра“, заклучи каталонскиот стратег.

Единствената шанса за трофеј за Сити сезонава ќе биде на 17 мај на „Вембли“ кога тимот на Пеп во финалето од ФА купот ќе се соочи со изненадувањето Кристал Палас, кој во полуфиналето ја изненади Астон Вила победувајќи ја со убедливи 3:0.