Португалските медиуми удрија по селекторот и Роналдо: Ужас, его и ароганција

Португалските медиуми се бесни по елиминацијата на Португалија од Светското првенство. Португалците синоќа во Далас загубија со 1:0 од Шпанија. Ги уништи голот на Микел Мерино во 1. минута од судиското надополнување.

На удар на медиумите, што досега беше незамисливо, се најголемата ѕвезда, 41-годишниот Кристијано Роналдо, и селекторот, кој веќе и не е селектор на Португалија (му заврши мандатот), Роберто Мартинес.

„Време е еднаш засекогаш да се затвори циклусот на капитенот, кој и онака траеше предолго. Со Роберто Мартинес на клупата, Португалија беше преценета и плашлива репрезентација која не ги исполни огромните очекувања“, пишува A Bola, наведувајќи дека е време да се збогуваме со Кристијано Роналдо од репрезентацијата. Текстот е напишан под наслов „Cristiano Ronaldo: não te queremos 'matar', mas chega“ (Кристијано Роналдо: Не сакаме да те „убиеме“, но доста е).

„Одлуката Гонсалу Рамуш да остане на клупата, во натпревар во кој Шпанија постепено ја туркаше Португалија сè подлабоко и подлабоко кон својот гол во второто полувреме, беше шлагот на ужасот за Роберто Мартинес, дипломатот избран од Португалската фудбалска федерација да не прави бранови, да се смее и да мавта додека куќата гори“, пишува A Bola.

Во истиот текст, пристапот на Португалската фудбалска федерација е опишан како „арогантен и самоуверен“ и се наведува дека ентузијазмот на милиони Португалци бил поттикнат од изјавата „сè е наше, Португалија ќе успее на ова првенство, никогаш во историјата на националниот тим не е виден среден ред од таква класа, Кристијано Роналдо ќе ги замолкне сите оние што сакаа да го „убијат“ 23 години, а Диогу Жота би бил горд да види што неговите соиграчи направиле за него“.

На крајот, Португалците одиграа само 5 натпревари, „од кои два, против ДР Конго и Колумбија, беа срамни“.

„А, виновникот има име: Роберто Мартинес. Опсесијата да не се допрат статусите на Кристијано Роналдо и Бруну Фернандеш, кој е светлосни години далеку од играчот што беше прогласен за најдобар фудбалер на сезоната во Премиер лигата пред неколку месеци, сега ја остави Португалија во солзи“, се додава во текстот.

„Време е еднаш засекогаш да свртиме нова страница. Циклусот на Роберто Мартинес ќе заврши без сјај и слава. Во историјата ќе му остане запишано дека ја освоил само безличната Лига на нации, особено во споредба со разочарувањата на Европското првенство и ова Светско првенство. Роберто Мартинес се покажа како плашлив тренер“, се вели понатаму во текстот и се бара промена на клупата и промоција на новиот селектор Жорже Жезуш.

„Време е Кристијано Роналдо да се повлече, бидејќи веќе сфативме дека неговото его не му дозволува да му биде резерва на играч кој денес дава неспоредливо подобар придонес. Засекогаш ќе остане непознато како би изгледало ова Светско првенство без болната обврска на Кристијано Роналдо да биде на теренот сите 90 минути, на секој натпревар. И оваа елиминација не може да ја поништи дури ни Доналд Трамп“, заклучува A Bola, со потсетување на скандалот што го одбележа Светското првенство.

Ова беше шести настап на Роналдо на светските првенства, по 2006, 2010, 2014, 2018 и 2022. Во групната фаза на овогодинешниот турнир стана првиот играч во историјата што постигнал гол на 6 различни Светски првенства, откако ја затресе мрежата на Узбекистан.

Во тој меч постигна два гола, а потоа постигна гол од пенал против Хрватска во шестнаестинафиналето, што беше неговиот прв гол во нокаут фазата на Светските првенства. Го заврши овогодинешниот турнир со 3 погодоци. Роналдо одигра 27 натпревари на Светските првенства, а само Лионел Меси има повеќе, 30. Во тие 27 настапи Португалецот постигна 11 голови и имаше 2 асистенции.

Вкупно одигра 233 натпревари за Португалија, постигна 146 голови и асистираше 46 пати. Со репрезентацијата беше европски шампион во 2016 година, а освои и две Лига на нации.