Египетските и арапските медиуми ја анализираат драматичната елиминација на „фараоните“ од Аргентина во осминафиналето на Светското првенство, а нивните извештаи се полни со негодување поради судењето кое, како што велат, „ги премина сите граници“. Аргентина го победи Египет со 3:2 по пресврт и со тоа се пласираше понатаму, но натпреварот остана во сенка на контроверзии.
Египетскиот спортски весник Kingfut го стави фокусот на ВАР и на насловната страница објави изјави на селекторот Хосам Хасан, кој отворено го нарече судењето на францускиот судија Франсоа Летексје „скандал“. Египќаните се пожалија на поништениот гол и двата наводни недосудени пенали во самиот финиш од натпреварот, непосредно пред решавачкиот гол на Аргентина, а таквите поплаки беа поддржани од медиумите низ регионот.
Египетскиот весник Youm7 отиде чекор понатаму, тврдејќи дека одлуките на Летексје „станаа една од најконтроверзните на целиот турнир“. Во текстот се наведува дека сериозноста на настанот „ги надмина границите на теренот“. Каирскиот весник Ahram пишува дека збогувањето на египетската репрезентација од Светското првенство се случило „среде контроверзноста околу судиите“ и ја споменува општата „огорченост“ во арапскиот спорт.
Медиумските аналитичари, поранешните фудбалери Халед Гадала и Башир ал Табаи, истакнаа дека поништувањето на голот на Зизо „нема оправдување“. Телевизиските канали како Bein Sports, кои ексклузивно го емитуваат првенството за Египет, се согласуваат со оваа анализа.
Тие посочија на недоследноста, наведувајќи дека ако аргументот на ВАР за фаулот што му претходел на поништениот египетски гол беше прифатен, истото правило требаше да се примени и на последниот гол на Аргентина.
Според нив, акцијата за победничкиот гол на Енцо Фернандес во 91-та минута започнала со прекршок врз Мохамед Салах во аргентинскиот шеснаесетник. Ахрам го нарече прекршокот досуден на Маруан Атиа, што доведе до поништување на голот на Мостафа Зико, „сомнителен“ и процени дека голот ќе го одлучеше натпреварот.
Дополнително, Ахрам го осудува судијата за „простувањето“ на црвениот картон на Науела Молина за она што го сметаат за „неспортско однесување“. Весникот директно ја обвинува и телевизиската продукција на турнирот, нагласувајќи дека споменатата ситуација „не била повторно прикажана за време на преносот во живо“.
Локалните медиуми го пренесуваат и големото незадоволство на навивачите на социјалните мрежи. Тие истакнуваат дека терминот „поткупен судија“ стана водечки тренд во земјата на платформата X, поради што судијата Летексје беше принуден да го затвори својот профил по лавина критики.
Исто така, има извештаи за онлајн петиција со која се бара оставка од претседателот на ФИФА, Џани Инфантино, како и ширење мемиња генерирани од вештачка интелигенција во кои се исмејуваат наводните пристрасности на ФИФА кон аргентинската репрезентација.
