По три и пол-годишна пауза назад во репрезентацијата е играчот од средниот ред Бобан Николов. Тој смета дека притисокот на баражот е кај Данците, а Македонија нема што да изгуби.
Повратникот во редовите на Вардар нема играно во дресот со националните бои од оној пријателски пораз од Азербејџан среде Скопје на 20 ноември 2022 година.
Новиот селектор Гоце Седлоски, кој истовремено е и тренер на Вардар, го врати Николов во репрезентацијата токму за мундијалскиот бараж против Данска.
„Сите знаеме што значи да се игра за репрезентација. Тоа не може да се спореди со ништо, играш за својата држава и ја претставуваш. Се надевам дека ќе биде одлично и дека со моето искуство, заедно со сите во тимот, ќе придонесам да стигнеме до посакуваната цел“, вели Николов.
Данците важат за фаворите, играат дома пред својата публика, а нивниот скап состав со играчи што играат во големите лиги делува застрашувачки. Но, натпреварот почнува од 0:0.
„Искрено верувам дека можеме. Нормално е да се надеваме, а ако ни е денот, можеме и да изненадиме. Сите веруваме и дојдовме тука со таа цел. Нема да се предадеме, ако сите одиграме на највисоко ниво, можеме да сонуваме за пласман. Прво размислуваме за Данска, тоа е најважниот натпревар. Притисокот е на нивна страна, а ние немаме што да изгубиме, можеме само многу да добиеме. Ќе влеземе смирено, ќе го оставиме срцето на терен, па што биде нека биде.“
Предност за играчите како Николов што доаѓаат од скопски Вардар е тоа што за нив ова не се први тренинзи со новиот селектор, бидејќи веќе работат под негова палка на клупско ниво.
„Селекторот носи агресија и силна мотивација. Знае како да ги поттикне играчите и мислам дека тоа е голем плус за нас. Ако таа енергија се пренесе на терен, можеме многу да постигнеме.“
31-годишниот Николов за Македонија има одиграно 48 настапи и постигнато 4 голови и го очекува својот јубилеен 50-ти настап.
