Премиер лигата е бисер за економијата: Носи 33 милијарди фунти и 107.000 работни места

Како најсилна фудбалска лига во светот, англиската Премиер лига е вистински економски мотор на Обединетото Кралство, а шпанскиот Mundo Deportivo објави неколку многу интересни податоци за ова натпреварување.

Премиер лигата продолжува да расте. Тековната проценка на економското и социјалното влијание сугерира дека фудбалското натпреварување ќе придонесе неверојатни 33 милијарди фунти (38,5 милијарди евра) за економијата на Обединетото Кралство во следните две години.

Покрај овој придонес, тоа ќе генерира и даночни приходи до 14,8 милијарди фунти (17,28 милијарди евра) и, најинтересно, поддржува неверојатни 107.000 работни места секоја сезона.

Фактот дека е најгледаната фудбалска лига во светот, емитувана во 189 земји и со проценети 1,9 милијарди гледачи ширум светот, значи дека приходите од меѓународните права за емитување на Премиер лигата вредат 1,8 милијарди фунти (2,1 милијарди евра), што е еднакво на остатокот од телевизискиот сектор во Обединетото Кралство заедно.

Меѓународниот интерес за Премиер лигата е таков што во сезоната 2023/2024 1,1 милион меѓународни навивачи допатувале во Англија само за да гледаат натпревари од Премиер лигата, генерирајќи повеќе од 1 милијарда фунти (1,167 милијарди евра) бруто додадена вредност за регионот и претставувајќи 2,6% од сите меѓународни туристички посети на земјата.

„Во текот на три децении, Премиер лигата еволуираше од домашно фудбалско натпреварување во еден од најуспешните глобални извози на Обединетото Кралство. Ја гледа публика ширум светот и ја следат повеќе од милијарда навивачи, а нејзиното влијание и позитивни придонеси се протегаат далеку над теренот. Популарноста на натпреварувањето, возбудливиот фудбал и преполните, живи стадиони се добро познати, но нејзиното економско и социјално влијание е помалку широко препознаено“, вели Питер Арнолд, главен економист во британски EY (Ernst & Young).

Во извештајот се истакнува и трансформацијата на стадионите и тренинг-објектите за сите тимови што играле во Премиер лигата од нејзиното основање во 1992 година. Поточно, од 51 клуб што учествувале во натпреварувањето, 22 изградиле или се преселиле на нов стадион, додека вкупно 27 ги реновирале своите постоечки стадиони. Ова претставува кумулативно зголемување од повеќе од 290.000 нови седишта.

Овие проширувања овозможуваат и рекордна посетеност на стадионите, со 15,9 милиони гледачи што присуствувале на натпреварите од Премиер лигата во текот на сезоната 2025/2026, додека извештајот на EY предвидува дека вкупниот капацитет на натпреварувањето би можел да надмине 900.000 седишта благодарение на планираните и предложените развојни проекти.

Проектите финансирани од Фондацијата на Премиер лигата и добротворните иницијативи од клубовите од Премиер лигата ќе генерираат 4,3 милијарди фунти (5 милијарди евра) социјална вредност. Овие придобивки вклучуваат образование, вработување, намалување на криминалот, ментално здравје, физичко здравје, благосостојба и кохезија на заедницата.

Иако Премиер лигата е првенство на Англија, придонесува за целокупната еконмија на Обединетото Кралство бидејќи Англија е држава во склоп на ова карлство. Шкотска, Велс и Северна Ирска имаа свои лиги, но ни одблиску не се ниту толку популарни ниту толку профитабилни како англиската.

Целосниот извештај можете да го погледнете тука.