Продолжува „војната“ меѓу Винисиус и Симеоне

Синоќа, играчите на Реал го победија Атлетико со резултат од 2:1 и се пласираа во финалето на шпанскиот Суперкуп, каде што ќе играат против Барселона, а конфликтот меѓу Винисиус Жуниор и Диего Симеоне повторно беше во центарот на вниманието.

Напаѓачот на Реал и тренерот на Атлетико водат „војна“ со години, која продолжи и синоќа, а вербално се судрија двапати за време на натпреварот.

Прво, во првото полувреме, Симеоне, вознемирен од симулацијата на фаул од Винисиус, се приближи до аут-линијата и, според толкувањето на коментаторите на Movistar, извикал:

„Флорентино ќе те избрка, запомни што ти велам!“

Подоцна, во 81-та минута, кога напаѓачот на Реал Мадрид ја напушташе играта, дојде до уште еден вербален конфликт меѓу Бразилецот и Аргентинецот.

Винисиус дофрли нешто кон Симеоне, а тренерот на Јорганџиите одговори покажувајќи кон трибините и му рече да ги слуша свирежите на навивачите на Реал.

Ова не е првпат тренерот на Атлетико и напаѓачот на Реал да влезат во директен конфликт за време на натпреварите.

И во септември 2022 година, Симеоне го нападна Винисиус кога Бразилецот ја одложуваше играта со постојано тркалање по тревникот, а врвот на нивната нетрпеливост се случи во Купот на кралот во 2024 година кога Винисиус му асистираше на Хоселу во финишот од натпреварот за 2:2 и за време на прославата се сврте кон навивачите на Атлетико и ги провоцираше, што го разбесни Симеоне.

Инцидентот ескалираше на крајот од регуларниот дел од натпреварот кога играчите од двата тима ги спречија физички да се степаат.