Реконструкцијата на стадионот „Камп Ноу“ се претвори во изградбата на патот Охрид-Кичево. Веќе пет пати се одложува отворањето на стадионот во Барселона, кој ќе го носи името на неговиот спонзор „Спотифај Камп Ноу“. Ова се должи на доцнење во работата и нецелосна документација.
Претседателот Жоан Лапорта се надеваше дека натпреварот против Валенсија ќе се игра на „Камп Ноу“, но тоа не се случи. Барса мораше да игра на стадионот „Јохан Кројф“, а бидејќи дозволата сè уште не е издадена, следниот натпревар против Хетафе ќе се игра надвор од главниот стадион.
Каталонците се надеваат на чудо и дозвола за користење денес или евентуално утре, но тешко е да се поверува дека таа ќе стигне, ниту дека Ла Лига ќе дозволи натпреварот да се игра во реновираното здание.
Барселона има „нова цел“ пред себе, а тоа е да биде домаќин на натпреварот од Лигата на шампионите на УЕФА против Пари Сен-Жермен на 1 октомври на стадионот „Камп Ноу“. Цела среќа што во воведното коло Барса гостува (в четврток кај Њукасл), па домаќин е во второто. За УЕФА да има време да го прифати стадионот, прво мора да се одигра еден лигашки натпревар, а останува само оној со Реал Сосиедад на 28 септември, бидејќи седум дена порано гостуваат во Овиедо.
Доколку дозволите стигнат на време, можеби Барселона ќе успее во својот најнов план. Секако, кога ќе се отвори „Камп Ноу“, касата на клубот ќе биде растеретена бидејќи ќе бидат префрлени парите за продадените ВИП ложи.
