Атлетико ја елиминираше Барселона во четвртфиналето на Лигата на шампионите со серија сомнителни судиски одлуки што го одбележаа двомечот.
Каталонците двата натпревара ги завршија со играч помалку - на „Камп Ноу“ исклучен беше Пау Кубарси, а на „Ванда Метрополитано“ иста судбина го снајде Ерик Гарсиа. И двајцата беа најстрого казнети за тоа што ги срушија своите ривали како последни одбранбени играчи - само што синоќешната одлука на Клемон Турпан беше за многу подетална анализа.
Францускиот судија откако ја гледаше ВАР снимката го смени првично покажаниот жолт картон во црвен и му дозволи на Атлетико да го доведе натпреварот до помирен крај. Затоа по овој меч, како што беше случајот минатата недела, пристигнуваат поплаки за судењето и двојните стандарди. Меѓу другите, се огласи и легендата на Барселона, Карлес Пујол, кој без двоумење им порача на судиите дека „ако сакаат да бидат ѕвезди на вечерта, треба да одат во циркус“.
„Уморен сум од овие изговори! Цел живот играм фудбал и никогаш не сум видел таква недоследност. Ерик Гарсиа е исклучен поради едноставен дефанзивен старт - нешто што го гледаме педесет пати по натпревар - а сепак кога Дани Олмо е очигледно турнат на теренот, нема ниту свиреж? Кажете ми ја разликата помеѓу овие две ситуации. Во едниот случај, тоа е директен црвен картон, во другиот, ништо? Тоа е толку очигледен скандал. Ако некои судии сакаат да бидат ѕвезди на вечерта, нека одат во циркус. Ова е срам за Лигата на шампионите и непочитување кон Барселона. Доста е“, порача Пујол.
Пујол како дете на Барса ја мина целата кариера во каталонскиот гигант играјќи за првиот тим од 1999 година сѐ до пензионирањето во 2014. Освои куп пехари меѓу кои 5 пати Ла Лига, 2 во Копа дел Реј, 4 шпански Суперкупа, 3 во Лигата на шампионите, 1 УЕФА суперкуп и 2 пати Светско клупско првенство.
За репрезентацијата на Шпанија одигра точно 100 натпревари и беше дел од генерацијата што стана европски и светски шампион во 2008 и 2010. Одигра и 6 натпревари за неговата матична репрезентација Каталонија, непризната од ФИФА.
