Клубот од Дебар Маало по цели 28 години повторно ќе игра во втората лига. Во новата сезона ќе влезе со комплетно нов тим, а денеска ги промовираше и 10-те нови фудбалери.
Откако по катастрофалната ланска сезона во која клупската управа тотално потфрли расипувајќи го тимот што сезоната 2024/2025 ја заврши на 3. место со тоа што докажаните играчи ги замени со третолигашки играчи и странци со сомнителен квалитет, па на полусезона со ремонт се обиде да го иозгаси огнот, но не успеа и го однесе клубот ранг подолу.
Штом Работнички испадна, а поради правилото дека странци не може да играат во втората лига, клубот веднаш го напуштија петтемина странци, како и неколку домашни играчи. Капитенот Бесир Демири замина во Шкендија 77 заедно со Дашмир Елези и Аритон Мехмед, Теодор Николовски и Јован Попзлатанов во пакет отидоа во Тиквеш како и Никола Манојлов и Мартин Талаков во Силекс, Егзон Белица се врати во родниот град Струга, Леонид Стојкоски во амбициозниот третолигашп Илинден, а Сихејљ Мухарем во црногорски Отрант.
Нови играчи во тимот на новиот предводник Баже Јанакиевски се: голманот Амар Хаџибулиќ од Тетекс, стоперот Христијан Митревски и левиот бек Христијан Поп-Антоски од Осогово, стоперот Мартин Мисердовски од Дет. Плачковица, десниот бек Христијан Пецов од Македонија ЃП, левиот бек Дамјан Спасовски од словенечниот третолигаш Индрија, играчот од средниот ред Давид Манасиевски од Башкими, дефанзивниот играч од средината Виктор Серафимовски од Брегалница, напаѓачот Александар Богданоски од Кожуф и напаѓачот Андреј Кудијан кој доаѓа од тимот на македонската дијаспора во Швајцарија - Иберико-Маседониа.
Во тимот се прекомандувани и неколкумина од младинците, како крилото Матеј Киш.
„Романтичарите“ второлигашката авантура ја започнуваат в сабота од 17 часот против гевгелиски Кожуф. Натпреварот ќе се игра на стадионот „Борис Трајковски“ во Маџари.
