Триесет и седум годишниот Иван Ракитиќ, еден од најдобрите хрватски фудбалери во последните две децении, преку видеопорака објавена денес на социјалните мрежи потврди дека ја завршува фудбалската кариера.
Со објавата тој ги потврди шпекулациите од пред десетина дена кога не беше на почетокот на подготовките на сплитски Хајдук.
Ракитиќ ја завршува кариерата со 106 настапи и 15 погодоци во дресот на Хрватска, 323 натпревари за Севиља, 310 за Барселона и повеќе од 100 за Шалке 04.
Роден е во Швајцарија, а кариерата ја започна во Базел. Патот потоа го одведе во Шалке 04, Севиља, Барселона, повторно Севиља, Ал Шабаб и на крај Хајдук.
Хрватските медиуми објавуваат дека Ракитиќ, кој освои 17 клупски трофеи, ќе остане во фудбалот бидејќи ќе биде дел од стручниот штаб на Горан Вучевиќ, спортскиот директор на клубот од „Пољуд“.
Со „Ватрените“ во 2018 година стигна до сребрниот медал на Светското првенство во Русија, а од националниот тим се повлече наредната година.
