Првотимецот на Реал, Килјан Мбапе ќе го пропушти натпреварот против Хетафе поради повреда на скочниот зглоб на десната нога и е неизвесен за саботното финале од Копа дел Реј против Барселона.
„Сѐ уште чувствува болка и нема да може да му помогне на тимот. Се повреди на натпреварот против Арсенал минатата среда и оттогаш прима терапија. Прави сѐ за да биде на располагање во сабота“, изјави тренерот на Реал, Карло Анчелоти, на прес-конференција.
Во меѓувреме, Реал беше елиминиран во четвртфиналето на Лигата на шампионите од Арсенал. Мадриѓаните во Ла Лига заостануваат 4 бодови зад лидерот Барселона, па најголема шанса за освојување на трофеј им е купот. Куп финалето на програмата е в сабота од 22 часот, на стадионот „Ла Картуха“ во Севиља.
Мбапе не играше против Атлетик од Билбао во неделата поради суспензија. Реал победи со гол на Феде Валверде постигнат во 3. минута од судиското надополнување.
