Роналдо им се потсмеваше на Ирците, па го стигна карма и доби црвен

Кристијано Роналдо имаше кошмарна ноќ синоќа во поразот на Португалија на гости кај Ирска, а во таа прилика доби директен црвен картон, што доведе до пресметка со домашните навивачи.

Роналдо, кој беше исклучен за прв пат во 226 настапи за Португалија, самиот беше виновен за сцените кои му ги приредија Ирците.

Португалија загуби со 2:0, а за да биде уште полошо за Роналдо, му беше покажан црвен картон поради кој може да ги пропушти првите два натпревара на Светското првенство, доколку ја добие очекуваната суспензија од три натпревари поради директен црвен картон.

Роналдо го шутна својот противник Дара О'Ши во втората половина од натпреварот во дуел во шеснаесетникот. Најпрво доби жолт картон, но по прегледот на ВАР, судијата правилно ја промени својата одлука и му покажа црвен картон.

Кога првпат доби жолт картон, Роналдо му се потсмеваше на О'Ши имитирајќи триење на очите, како играчот да плаче без вистинска потреба. Сепак, кармата силно му врати.

Судијата ја смени одлуката и му покажа црвен картон, а потоа целиот стадион го исмеа Роналдо на ист начин, алудирајќи на солзи. Извикуваа „Меси, Меси“, а Роналдо не беше задоволен, па ги поздрави со ироничен аплауз и насмевки, видливо фрустриран.

Роналдо дефинитивно нема да игра на последниот меч од квалификациите во кој Португалија ќе брка пласман на Мундијалот, а тоа ќе треба да го направи на домашен терен против Ерменија в недела.