Легендарниот англиски фудбалер Вејн Руни сè уште „не може да се изначуди“ што можеби најпознатиот натпревар во историјата на англиската Премиер лига не е под истрага.
Секако, станува збор за победата на Манчестер Сити од 3:2 над Квинс Парк Ренџерс во последното коло од Премиер лигата во 2012 година.
Во таа прилика, Манчестер Сити ја освои титулата во англиското првенство со голови во судиското продолжение. Головите за пресврт ги постигнаа Един Џеко и Серхио Агуеро, со што станаа „бесмртни“ во историјата на англискиот фудбал.
Така, Сити му ја украде титулата на Манчестер Јунајтед, иако „Црвените ѓаволи“ го завршија својот натпревар на друг стадион и веќе почнаа да слават.
Легендарниот Руни сè уште е фрустриран од тој момент кој, и покрај бројните титули и трофеи, ја одбележа неговата кариера. Поранешниот капитен на Јунајтед сè уште не може да се изначуди зошто натпреварот не беше истражен за наводно местење.
„Очигледно беше тешко да брани КПР, но нели Пади Кени ја предаде топката на Сити? КПР знаеја дека обезбедија опстанок, Сити израмни на 2:2, а потоа КПР едноставно им ја врати топката. Го имаа Сисе на теренот, Бартон беше исклучен поради глупаво однесување, Рајт-Филипс и Онуоха беа таму... Тоа дефинитивно требаше да биде под истрага“, рече Руни во поткастот „Overlap“.
Не е прв пат Руни јавно да каже дека натпреварот Сити - КПР треба да се истражи.
„Пади Кени требаше да биде подобар кај неколку голови. Сити го постигна вториот гол, а КПР им ја врати топката. Тоа никогаш не беше доведено во прашање, а Џибрил Сисе на крајот славеше со играчите на Сити“, коментираше претходно Руни.
