Историска пресвртница за фудбалот во Сан Марино. Во понеделникот во прес-салата на стадионот „Сан Марино“ беше презентиран проект што ги ажурира сите поглавја од историјата на фудбалот во најслабата европска фудбалска нација.
За тоа што долго се зборуваше, сега станува реалност: Сан Марино ќе има сениорска женска фудбалска репрезентација. Претседаваше со конференцијата жената што ќе го води проектот: првата селекторка, поранешната италијанска репрезентативка Џулиа Доменикети.
Прв што зборуваше беше претседателот на Фудбалската федерација на Сан Марино (ФСГЦ), Марко Тура: „Ова е историски настан. Се впуштаме во патување кое наскоро ќе ни овозможи да се претставиме пред европскиот фудбал во сектор што досега никогаш не сме имале можност да го развиеме, и покрај тоа што ја негуваме желбата за тоа.“
Џулиа Доменикети, поранешна членка на репрезентацијата на Италија и пивот во футсал, но и поранешна тренерка на првиот тим на Сан Марино Академи од сезоната 2022/2023, потоа проговори: „Многу сум среќна што се враќам во санмаринскиот фудбал, а исто така сум особено горда што моето име беше меѓу оние што се разгледуваа за овој проект“. А, кога беше прашана какви чувства треба да отелотвори еден играч кога го носи дресот на Сан Марино, нејзиниот одговор беше апсолутно недвосмислен: „Гордост: гордоста да ја претставуваш својата земја и целото движење.“
Доменикети има 87 настапи за Италија и 6 постигнати голови, а со „Аѕурите“ играше на Европските првенства во 2005, 2009 и 2013. Играше и двапати против Македонија.
Вкупно 30 фудбалерки се повикани и избрани за првите тренинзи. Тренерскиот штаб е финализиран, а првата тренинг сесија под водство на Доменикети веќе е завршена: Сан Марино е подготвен да излезе на теренот за нов предизвик кон далечните хоризонти.
