Денеска се одиграа седум натпревари од првото коло во Купот на Македонија, по што сега се познати 13 од 16-те осминафиналисти.
Најголемото изненадување го приреди третолигашот Саса кој во Македонска Каменица со минимални 1:0 го совлада чаирски Шкупи и го исфрли од Купот. Според имињата на клубовите, ова е изненадување, но со оглед на проблемите со кои чаирскиот клуб со соочува и игра со младинци, во реалноста и не е толкаво изненадување.
Лани Охрид Лихнидос беше на чекор од големото финале, по пат го елиминираше и Вардар, но сега заринка уште во првото коло. Охриѓани не успеаја да го преживеат Новаци и со гол на две минути пред крајот се соочија со неочекувана рана елиминација.
Арачиновска Шкендија 77, која како и охриѓани лани беше полуфиналист, го продолжува патот откако победнички мина низ Радовиш кај Плачковица.
Беласица со пресврт славеше на гости кај Осогово, Скопје минимално триумфираше кај Кожуф, додека Башкими лесно мина кај третолигашот БВК Коњаре и го почести со петарда.
Тетекс од непознати причини наместо во Тетово глумеше домаќин во Штип на теренот на својот противник Брегалница. Иако Тетекс поведе, штипјани триумфираа со 4:1.
Остануваат уште три натпревари за да се комплетираат сите осминафинналисти, а тие ќе се одиграат на 24 месецов (Могила - Арсими) и на 6 и 14 октомври (Крошу - Тиквеш и Вардар Неготино - Работнички).
Претходно место во осминафиналето обезбедија Струга, Пелистер, Брера Струмица, Македонија ЃП и Вардар, додека Силекс како актуелен шампион го прескокна првото коло.
Стадион „Петровец“ во Петровец
БВК Коњаре - Башкими 0:5 (0:1)
Стрелци: 25' (аг) Бурим Алиев, 62' Теодор Мирчевски, 69' Џулјан Капланај, 78' Андри Стафа, 81' Стефан Ристовски
Главен судија: Боби Величков (Велес)
Стадион „Градски“ во Македонска Каменица
Саса - Шкупи 1:0 (1:0)
Стрелци: 36' Драган Паунов
Главен судија: Ивица Перовски (Брвеница)
Стадион „Градски“ во Штип
Тетекс - Брегалница 1:4 (1:1)
Стрелци: 28' Никола Ристевски - 36' Филип Алексовски, 49' Натаниел Лорензоу, 73' (аг) Мартин Јованоски, 77' Даријан Тасев
Главен судија: Александар Василевски (Скопје)
Стадион „Градски“ во Радовиш
Дет. Плачковица - Шкендија 77 1:3 (0:2)
Стрелци: 54' Бранимир Иванов - 33' Дашмир Елези, 42' Марко Симоновски, 68' (п) Бесир Демири
Црвени картони: 67' Асан Рифадов (ДП)
Главен судија: Благојче Ралевски (Битола)
Стадион „Новаци“ во Новаци
Новаци - Охрид Лихнидос 1:0 (0:0)
Стрелци: 88' Јованчо Трајкоски
Главен судија: Ндерим Тефику (Куманово)
Стадион „Градски“ во Гевгелија
Кожуф - Скопје 0:1 (0:1)
Стрелци: 45'+1 Виктор Ангелов
Главен судија: Ангелчо Ристов (Неготино)
Стадион „Никола Мантов“ во Кочани
Осогово - Беласица 1:3 (1:0)
Стрелци: 40' Даријан Трајчов - 47' Елмаз Емуш, 61' Благој Стојанов, 88' Рон Мемеди
Главен судија: Јордан Јовановски (Гевгелија)
