Селекторот на македонската репрезентација, Гоце Седлоски, денеска одржа прес-конференција на која го објави списокот на повикани фудбалери за четирите натпревари од новата сезона на Лигата на нации, каде „Рисовите“ ќе играат против Швајцарија, Словенија и Шкотска.
На списокот се најдоа четворица дебитанти и тоа дефанзивците Анес Мељичи и Ѓорге Џеков, првиот од Шкендија, вториот од Силекс, потоа играчот од средниот ред на белградска Црвена звезда, Матеј Гаштаров, како и голгетерот од домашната лига и напаѓач на Струга, Христијан Малески.
По пауза од четири години во националниот тим се враќа и дефанзивецот Марио Младеновски, кој со добрите настапи во дресот на хрватски Вараждин се избори за повик. Поради повреда Седлоски не може да смета на стоперот Никола Серафимов од софиски Левски, а од претходниот список не ги повика Дарко Велковски, Георгије Јанкулов, Имран Фетаи, Јован Манев, Стефан Деспотовски, Сефер Емини, Дарко Анѓелески, Дарко Додев и Милан Ристовски.
„Можеме да очекуваме борба, залагање и максимум на секој натпревар. Никогаш како играч немав четири натпревари во десет дена. Затоа повикав 25 фудбалери и три голмани. Ќе мора да ротираме и шанса ќе добијат повеќе играчи. Сакав да спојам младост и искуство. За никого не е затворена вратата од репрезентацијата, но ова е мојот избор за овие четири натпревари“, изјави Седлоски.
Селекторот очекува тимот во краткиот период на подготовки да ја изгради потребната компактност и хемија.
„Мора да бидеме компактни. Овие пет дена ќе ги искористиме да покажеме дека имаме тимска хемија. Никогаш претходно не биле повикани 6 фудбалери од македонската лига. Омерагиќ и Малески минатата сезона заедно постигнаа триесетина голови, а и оваа сезона редовно погодуваат и го заслужија повикот. Тука се Растодер и Миовски и мислам дека сме добро екипирани во нападот. Четири натпревари сме без постигнат гол, но верувам дека и нападот ќе проработи. Средниот ред мислам дека ни е адут“, додаде селекторот.
Седлоски најави промени и во дефанзивната линија, со Илиевски како една од опциите по десната страна, а во конкуренција е и Стојчевски. Остави можност списокот дополнително да биде надополнет.
„Желбата ми е да ги победиме сите четири натпревари, но реалноста е дека и противниците имаат свои квалитети. Во овој момент размислуваме само за првиот натпревар и за Швајцарија. Ги следев нивните натпревари на Светското првенство и мислам дека ќе бидат фаворити во групата. Но, верувам дека можеме да се носиме и со нив, и со Шкотска и Словенија“, вели Седлоски.
Селекторот се осврна и на клупската ситуација на неколку репрезентативци. Посебно го радува фактот што Елиф Елмас пронајде средина во која ќе има можност да игра во континуитет откако летово пристигна во Бергамо во дресот на Аталанта.
„Ме радува што Елмас пронајде клуб каде што ќе настапува во континуитет. Разговарав и со Миовски, кој во еден момент беше со мислите надвор од Ренџерс. Но, дојде до пресврт и тренерот му вети минутажа. Јас ќе бидам најсреќен ако нашите фудбалери играат редовно и се во натпреварувачки ритам“, заклучи Седлоски.
Македонија циклусот го отвора на 26 септември на домашен терен против Швајцарија, а потоа следуваат гостувањето кај Словенија на 29-ти, домашниот натпревар со Шкотска на 3 октомври и гостувањето кај Швајцарија три дена подоцна. Последните два натпревара од групата ќе се играат во ноември.
