Според La Gazzetta dello Sport, Даниел Малдини не само што не го поминал алкотестот по сообраќајната несреќа во неделата наутро, туку бил позитивен и на прелиминарниот тест за проверка за употреба на дрога.
Работите одат од лошо на полошо за напаѓачот на Каљари, Даниел Малдини, син на легендата на Италија и Милан, Паоло.
24-годишникот беше вклучен во сообраќајна несреќа во неделата наутро во Милано, откако го постигна победничкиот гол во победата на Каљари од 2:1 на гости против Аталанта.
Малдини го возел своето Porsche Carrera 4 со уште три лица во автомобилот и, според извештаите, не отстапил место на Volkswagen Golf во кој се превезувале маж и жена, што предизвикало несреќа.
Полицијата и амбулантните возила пристигнале на местото на настанот, каде што Малдини не го поминал алкотестот. Првиот тест бил 0,91 мг/л, а вториот 0,89 мг/л, над законската граница во Италија од 0,5 мг/л. Затоа, полицијата му ја конфискувала возачката дозвола.
За да биде уште полошо, според Gazzetta, Малдини бил позитивен и на прелиминарниот тест за проверка за употреба на дрога. Сега се чекаат целосните резултати од токсиколошките тестови на болницата.
За среќа, сообраќајната несреќа не го повредила Малдини ниту некој друг вклучен во неа. Малдини бил отпуштен од болницата „Фатебенефратели“ во неделата и се вратил дома да отспие.
„По кратката проценка во одделот за итна помош, Даниел веднаш беше пуштен дома и е со добро здравје“, изјави адвокатот Данило Буонџорно, правен застапник на фудбалерот „Даниел е добро и не претрпе никаква повреда, а камоли сериозна“, појасни Буонџорно, пренесува Il Giorno.
Каљари му дозволи слободен ден по натпреварот на гостувањето кај Аталанта, а Малдини требаше да продолжи со тренинзите денес.
Досега, Каљари не реагираше, ниту презеде мерки против својот напаѓач, кој се очекува денеска да се појави на Сардинија.
Даниел Малдини не успеа да ги следи стапките на неговите славни дедо и татко, Чезаре и Паоло, кои како дефанзивци направија импресивни кариери во дресот на Милан и на Италија. Даниел ја прекина семејната традиција и иако почна во дефанзивата потоа стана напаѓач. Откако Милан се откажа од него прво одеше на позајмици во Специја, Емполи и Монца, па го купи Аталанта која исто така брзо се разочара па го прати на позајмица прво во Лацио, а сега во Каљари.
