Срушен трансфер рекордот во женскиот фудбал: Арсенал ја потпиша Оливија Смит за милион фунти

Додека машките тимови трошат милијарди, првиот трансфер вреден милион фунти во женскиот фудбал штотуку се комплетираше. Станува збор за Оливија Смит, фудбалерка на Ливерпул чија откупна клаузула беше активирана од Арсенал.

Така, нејзиниот трансфер сруши рекорд и испиша нови страници во историјата на спортот. На врвот на листата на најскапи фудбалерки на планетата таа ја престигна Наоми Гирма, која се пресели во Челси во јануари за 883 илјади фунти, што е 1 милион и 25 илјади евра.

Канадската интернационалка помина само една сезона на „Енфилд“ откако пристигна од Спортинг минатото лето. Во тој период, како напаѓачка, стана најдобар стрелец на тимот со 9 голови, а беше и избрана за најдобар играч на Ливерпул минатата сезона.

Таа ќе се придружи на машината на Арсенал, која неодамна ја освои својата втора титула во Лигата на шампионите за жени, со триумф од 1:0 над Барселона на стадионот „Жозе Алваладе“ во Лисабон.