Суарес повторно гризна, но овој пат соиграч

Легендарниот уругвајски фудбалер Луис Суарес е познат по тоа што во текот на кариерата ги гризеше своите ривали на теренот, а два од најпознатите инциденти беа кога ги гризна Џорџо Кјелини и Бранислав Ивановиќ.

Суарес синоќа имаше уште еден таков момент, а овој пат го гризна, верувале или не, сопствениот соиграч од тимот на Интер Мајами.

Во еден момент на теренот летаа искри меѓу играчите на Интер и Лос Анџелес, а тоа не можеше да се случи без Суарес во центарот на настаните.

Суарес се мачеше со противничките играчи, а од левата страна беше соиграчот Жорди Алба, кому Уругваецот во еден момент му ја гризна тупаницата.

Суарес очигледно мислел дека се работи за тупаница на противнички играч, која била многу блиску до неговата глава, а неговата реакција кога сфатил дека го гризе својот долгогодишен пријател и легенда на Барселона брзо стана хит.

Алба претходно се жалеше на повреда, а по контактот со Суарес падна на теренот од болки.

На крајот, натпреварот од Купот на шампионите на КОНКАКАФ заврши со 3:1 во корист на Интер Мајами, кој со тоа се пласираше во полуфиналето на ова натпреварување. Двоен стрелец беше Лионел Меси, а еден гол постигна Редондо Солари. Лонг беше единствениот стрелец за Лос Анџелес.