Тен Хаг заработил богатство за 62 дена работа: Протекоа детали за отпремнината

Се чинеше дека Ерик тен Хаг ја пронашол идеалната работа откако го презеде Баер Леверкузен во мај и потпиша тригодишен договор со „Фармацевтите“, но соработката помеѓу Холанѓанецот и клубот беше прекината по само два натпреварa во Бундеслигата.

Сега, се појавија детали за неговиот неверојатен пакет отпремнина. Работата во Леверкузен требаше да биде враќање на големата сцена за Тен Хаг, во клуб кој постигна историски успех под водство на Шаби Алонсо.

Сепак, неговиот мандат беше краткотраен, бидејќи беше отпуштен по поразот од Хофенхајм и нерешениот резултат со Вердер. Неговата единствена победа беше во купот против понисколигашот Зоненхоф Гросашпах.

Според германскиот весник Sport Bild, отпуштањето на Холанѓанецот ќе го чини клубот речиси 6 милиони евра отпремнина. Кога ќе се додаде неговата плата за двата месеца што ги помина на клупата, се доаѓа до бројката дека Тен Хаг го чинел клубот околу 100.000 евра дневно за време на неговиот 62-дневен мандат.

Тен Хаг повторно бара нова работа, а по две отпуштања за помалку од една година, неговиот углед е значително нарушен и останува да се види каде ќе ја продолжи кариерата.